Arrasate Eskubaloi

VII. JESUS MARIA HERRERO "PITXI" MEMORIALA

 

Ford Mugarri eta Trapaga izango ditugu aurrez aurre “Pitxi” Herrero Memorialaren finalean

Ane Herreroren mutilek 36-30 hartu dute mendean Gure Auzune, eta bizkaitarrak ere nagusitu dira (24-23) Eibarren kontrako neurketan. Irabazlearen izena domekan jakingo dugu, goizeko 12:30etatik aurrera.

Urtero legez, Iturripek Jesus Mari “Pitxi” Herrero zena omendu du, berari gustatuko zitzaion bezala: eskubaloiarekin. Aurtengo memorialean, Ford Mugarrirekin batera, beste hiru talde aritu dira: Trapaga, Gure Auzune eta Eibar. Eta bizkaitarren kontra, hain justu ere, jokatuko dute finala Ane Herreroren mutilek.

Arrasateko taldeak Gure Auzuneren kontra neurtu ditu indarrak gaur -zapatua- Iturripen, arratsaldeko 18:00etatik aurrera. Aurreikuspenak bat etorri dira azken emaitzarekin, garaipena etxekoentzat izan baita. Arauzko denbora amaitzean markagailuak 36-30koa erakusten zuen etxekoen alde.

Gure Auzunek eta Ford Mugarrik jokatutako partidua.

Beste finalerdian, arratsaldeko 16:30etatik aurrera jokatu dena, Eibar eta Trapaga izan ditugu aurrez aurre. Norgehiagoka osoan zehar parekotasuna izan da nagusi, eta 10 minuturen faltan armaginak aurretik baziren ere, Trapagak markagailua irauli du. Gauzak horrela, bihar -igandea- jokatuko den finalerako txartela poltsikoratu dute bizkaitarrek 24-23 irabazita.

Honenbestez, igande honetan jakingo dugu VIII. Jesus Mari “Pitxi” Herrero Memorialaren txapelduna zein den. Goizeko 12:30etatik aurrera Trapaga eta Ford Mugarri izango ditugu aurrez aurre. Lehenago, 11:00etan, Eibarrek eta Gure Auzunek hirugarren eta laugarren postuagatik borrokatuko dute.

Eibar eta Trapagaren arteko lehia, bi taldeak 2. Nazional mailakoak, parekatua izan da oso.

Trapaga 24–23 Eibar
Ford Mugarri 36-30 Gure Auzune